| | And I blissid be the yok that we been ynne | |
| | For in our actis we mowe do no synne | |
| 595 | A man may do no synne with his wyf | |
| | Ne hurte hym self with his owen knyf | |
| | Now haue we leue to pleye vs be the lawe | |
| | Thus labourith he til the day gan dawe | |
| | And than he takith a sop in fyn clarre | |
| 600 | And vp right on his bedde sittith he | |
| | And aftir that he sang ful lowde and clere | |
| | And kissith his wyf & makith wanton chere | |
| | He was al coltissh and ful of Ragery | |
| | And ful of Iargon as is a fleckid pye | |
| 605 | The slak skyn aboute his necke shakith | |
| | While that he song so chauntid he & crakith | |
| | But god woot what may thoughte in her hert | |
| | Whan she hym saw vp sitting in his sherte | |
| | In his nyght cappe and with his necke lene | |
| 610 | She preysith not his pleyynge worth a bene | |
| | Than sayde he thus my restyng wol I take | |
| | Now day is come I may no lenger wake | |
| | And doun he leyde his hed & slept til pryme | |
| | And aftir whan that he saw his tyme | |
| 615 | Vp risith Ianuary and fresh may | |
| | She holdith hir chamber til the fourthe day | |
| | As vsage is of wyuys for the beste | |
| | For euery labour sumtyme must haue reste | |
| | Or ellis longe may he not endure | |
| 620 | This is to say no liuys creature | |
| | Be it fish or bryd best or man | |
