| | Now wol I speke of this squyer damyan | |
| | That langurith for loue as ye shul here | |
| | Therfore I speke to hym in this manere | |
| 625 | I say o sely Damyan allas | |
| | Answere to this demaunde in this caas | |
| | How shalt thou thy lady fressh may | |
| | Telle thy woo she wol alwey say nay | |
| | Eke yf thow speke she wyl thy wo bewreyn | |
| 630 | God be thy help I can no bettir seyn | |
| | This sik Damyan in venus grete fier | |
| | So brennyth that he dieth for desir | |
| | For whiche he puttith his lif in auenture | |
| | No lenger myghte he in this wyse endure | |
| 635 | But priuely a penner gan he borowe | |
| | And in a lettir wroot al his sorow | |
| | In a maner of a compleynt or a lay | |
| | Vnto his fressh and fair lady May | |
| | And in a purs of silk hynge it on his shirt | |
| 640 | He hath y put and y leyd it at his herte | |
| | Thus hath Ianuary wedded fressh may | |
| | And the mone as I vnderstond that day | |
| | Out of taure was in the Cankir glidyn | |
| | So longe hath she in her chambir bidyn | |
| 645 | As custom is vnto thyse noblis alle | |
| | A bride shal not etyn in the halle | |
| | Til dayes four or thre atte leste | |
| | Passid be than let hir go to feste | |
| | The ferthe compleet fro noone to noone | |
| 650 | Whan that the high masse was doon | |
