| 770 | As euyr dede a dogge for the bowe | |
| | He is so plesaunt to euery man | |
| | For craft is al who so that it can | |
| | That euery wight is fayne to teche hym good | |
| | And fully in his ladies grace he stood | |
| 775 | Thus lete I damyan aboute his nede | |
| | And in my tale forth I wol procede | |
| | Som clerkis holden that felicite | |
| | Hit stont in delit and therfore he | |
| | This nobil Ianuary with al his myght | |
| 780 | In honest wyse as longeth to a knyght | |
| | Shoop hym to lyue ful deliciously | |
| | His howsing his aray as honestly | |
| | To his degre was made as a kyngis | |
| | Among other of his honest thingis | |
| 785 | He hadde a gardyn wallith al with ston | |
| | So feir a gardyn wot I nowher non | |
| | For out of doute I verily suppose | |
| | That he that wroot the romaunce of the Rose | |
| | Ne coude of it the beaute wel deuyse | |
| 790 | Ne priapus ne myghte not suffise | |
| | Though he be god of gardyns for to telle | |
| | The beaute of the gardyn and of the welle | |
| | That stood vnder a laurel al wey grene | |
| | Ful ofte tyme kyng pluto and his quene | |
| 795 | Proserpina and al her feyrye | |
| | Disporten hem and make melodye | |
| | Aboute that welle and daunsed as men tolde | |
| | This nobyl knyght this Ianuary the olde | |
