| 915 | And clappid to the wiket sodenly | |
| | Now wyf quod he here been but ye and I | |
| | That art the creature that I best loue | |
| | For by that lord that sit vs alle aboue | |
| | I hadde leuyr right now dye on a knyf | |
| 920 | Than the offenden myn owen dere wyf | |
| | For goddis sake think hou y the chees | |
| | Not for couetyse ne other good doutlees | |
| | But only for the loue I hadde to the | |
| | And though that y be old & may not se | |
| 925 | Be to me trewe and I wol telle the why | |
| | Certis thre thingis sholde ye wynne ther by | |
| | First loue of crist and to your self honour | |
| | And al myn heritage both toun and tour | |
| | I yeue it yow makith chartres as yow list | |
| 930 | This shal be do to morow or the sonne rist | |
| | So wisly god my soule brynge to blis | |
| | And I pray you of couenaunt ye me kis | |
| | And though I be ielous wite me nought | |
| | Ye be so depe pryntid in my thought | |
| 935 | That whan I consider your beaute | |
| | And therwith al the vnliklihede of me | |
| | I may not certis though I sholde dy | |
| | Forbere to been out of your company | |
| | For verry loue this is withouten doute | |
| 940 | Now kis me wyf and lete vs Rome aboute | |
| | This fressh may whan she the wordis herde | |
| | Benignely to Ianuary answerde | |
| | But first & forward she began to wepe | |
