| | I haue quod she a soule forto kepe | |
| 945 | As wel as ye and also myn honour | |
| | And of my wyfhode that tender flour | |
| | Whiche that I haue assured in your hond | |
| | Whan that the Preest to you my body bond | |
| | Wherfore I wol answere in this manere | |
| 950 | With the leue of you my lord so dere | |
| | I praye to god that yf ye euer se that day | |
| | That I ne sterue as foule as womman may | |
| | If euer I do to my kyn that shame | |
| | Or ellis I empeyre so my name | |
| 955 | That I be fals and yf I do that lak | |
| | Do strype me and put me in a sak | |
| | And in the nexte Ryuer do me drenche | |
| | I am a gentil womman and no wenche | |
| | Why speke ye thus but men be euer vntrewe | |
| 960 | And wommen haue repreef of you ay newe | |
| | Ye can non other comynycacion I leue | |
| | But speke to vs of vntrust & vs repreue | |
| | And with that word she saw where Damyan | |
| | Sat in the bush and knele he began | |
| 965 | And with hir fyngris signes made she | |
| | That Damyan sholde clymbe vp on a tre | |
| | That charged was with fruyt & vp he went | |
| | For verily he knewe al her entent | |
| | And euery signe that she coude make | |
| 970 | Wel bet than Ianuary her owen make | |
| | For in a lettir she hadde told hym al | |
| | Of this matere how he wirche shal | |
