| | Thus preysith he yet the bounte of man | |
| | Among a thousand men yet fond I one | |
| | But of alle wymmen fond he neuyr non | |
| 1005 | Thus said þe kyng þe so knowith your wickidnes | |
| | And also Ihesus Sirak as I gesse | |
| | Ne spekith of you but seldyn reuerence | |
| | A wylde fyre and a corupt pestilence | |
| | So falle on your bodies yet to nyght | |
| 1010 | Ne se ye not this honourable knyght | |
| | Be cause allas that he is blind and old | |
| | His owen man shal make hym Cokeold | |
| | Lo where he sit the lechour in the tre | |
| | Now wol I graunte of my mageste | |
| 1015 | Vnto this olde blynde worthy knyght | |
| | That he shal haue ayen his sight | |
| | Whan that his wyf wolde do hym vilonye | |
| | Than shal he knowe al her harlotry | |
| | Bothe in repreef of here and other mo | |
| 1020 | Ye shal quod preserpina and wol ye so | |
| | Now be my modris siris soule I swere | |
| | That she shal redily excusen her | |
| | And alle women after for her sake | |
| | Though they be in ony gilt y take | |
| 1025 | With face bold they shal hem self excuse | |
| | And bere hem doun that wolde hem accuse | |
| | For lak of answer non of hem shul dyen | |
| | Al hadde he seen a thing with bothe his yen | |
| | Yet shul we so visage it hardely | |
| 1030 | And wepe and swere and chyde subtilly | |
