| | How many myghte he haue in mariage | |
| | But herde y neuer tellyn in myn age | |
| 25 | Of this noumbre very diffinicion | |
| | Men mowe deme and glose vp a doun | |
| | Wel I woot expresse withoutyn lye | |
| | That god bad vs wexe and multiplye | |
| | That gentil text can I wel vnderstonde | |
| 30 | For wel y woot that myn husbonde | |
| | Sholde leue fader and moder and take to me | |
| | But of noumbre no mencion made he | |
| | Of bigamye or of Octogamye | |
| | Why sholde men speke of it velonye | |
| 35 | Lo here the wyse kyng Salamon | |
| | I trow he hadde wyues mo than on | |
| | As wolde to god it leefful were to me | |
| | To haue refresshing half so ofte as he | |
| | Whiche a yefte of god had he for al his wyuys | |
| 40 | Noman hath suche that now on lyue is | |
| | God woot this nobyl king as to my witte | |
| | The firste nyght hadde meny a mery fytte | |
| | With eche of hem so wel was hym on lyue | |
| | Blissid be god for I haue had fyue | |
| | Of whiche I haue pikid out of the beste | |
| | Bothe of her nethir ende and eke her cheste | |
| | Diuers scolis makith diuers clerkis | |
| | And diuers practik in many sondry werkis | |
| | Makith the parfiter man to be sikerly | |
| | Of fyue husbondis scoling am I | |
| 45 | Wel come the sixte when that euer he shal | |
