| | I wol hym not forsake no thing at al | |
| | When myn husbond is fro the worlde I gon | |
| | Som cristen man shal wedden me anon | |
| | For the apostel sayth that I am fre | |
| 50 | To wedde a goddis half where it likith me | |
| | He sayth to be weddid it is no synne | |
| | Bettir it is to be weddid than to blynne | |
| | What reckith me though men say vilonye | |
| | Of shrewde lameth and of his bigamye | |
| 55 | I woot abraham was a ful holy man | |
| | And eke Iacob as fer as euer I here can | |
| | And eche of them hadde mo wyuys than two | |
| | And meny another man also | |
| | Where can ye say in ony manere age | |
| 60 | That euer god defendid mariage | |
| | Be expresse wordis I pray you tel me | |
| | Or where comandid he euyr virginite | |
| | I woot as wel as ye it is no drede | |
| | The apostil when he spak of mayden hede | |
| 65 | He sayde that ther of precept had he noon | |
| | Men may counsel a womman to be oon | |
| | But counsel is no maner comandement | |
| | He puttith that in our Iugement | |
| | For hadde god comanded maydenhede | |
| 70 | Than had he dampned wedding out of drede | |
| | And certis yf ther were no seed I sowe | |
| | Virginite what sholde therof growe | |
| | Paule durste not comaunde atte leste | |
| | A thing whiche his maister yaf non heste | |
