| 75 | The dart is set vp on virginite | |
| | Cast who so may who rennyth best let se | |
| | But this word is not take of euery wight | |
| | But there as god wol yeue it of his myght | |
| | I woot wel the apostel was amayde | |
| 80 | But natheles though he wroot and sayde | |
| | He wolde wel euery wight were as he | |
| | Al is but counsel to virginite | |
| | And forto be a wyf he yaf me leue | |
| | Of indulgence so it be not to repreue | |
| 85 | To wedde me yf that my make dye | |
| | Withoute excepcioun of bigamye | |
| | Al were it good no woman forto towche | |
| | He mente in his bed or in his cowche | |
| | For paril it is fyre and tow to assembil | |
| 90 | Ye knowe what this ensample may resemble | |
| | This is al and som he held virginite | |
| | More parfit than wedding in freelte | |
| | Freelte clepe I but yf he or she | |
| | Wolde ledyn her lyf in chastite | |
| 95 | I graunte it weel I haue non enuy | |
| | Though maydenhede preferre bigamy | |
| | It likith hem to be cleen in body and gost | |
| | Of myn estate I wyl make no bost | |
| | Ful wele y knowe a lord in his hushold | |
| 100 | Hath meny a vessel of siluer and of gold | |
| | Som been of tre and don her lord seruise | |
| | God clepith to hym folk in sondry wyse | |
| | And eche hath of god a proper yeste | |
