| | Eche man as hym liste to shifte | |
| 105 | Virginite is a greet perfection | |
| | And continence eek with deuocion | |
| | But crist that is of perfection the welle | |
| | Bad not euery wight he sholde go selle | |
| | All that he hath and yeue it to the poure | |
| 110 | And in suche wyse folow him and his lore | |
| | He spak to hem that wil lyue parfitly | |
| | And lordingis be your leue that am not I | |
| | I wol bestowe the flour of al myn age | |
| | In the actis & in the fruyt of mariage | |
| 115 | Tel me also to what conclusion | |
| | Were membris maad of generacion | |
| | And of so parfit wyse a wight y wrought | |
| | Trust me wel they be not made for nought | |
| | Glose who so wol and sey vp an doun | |
| 120 | They were made for purgacion | |
| | Of vryne and of other thingis smale | |
| | Was eke to knowe a female from amale | |
| | And for no cause ellis say ye no | |
| | The experience woot wel it is not so | |
| 125 | So that ye clerkis with me be not wroth | |
| | I say thus they be made for both | |
| | That is to say bothe for office and for ese | |
| | Of engendernce there we god not displese | |
| | Why shulde not ellis men in bokis sette | |
| 130 | That man shal yelde to his wyf her dette | |
| | Where with sholde he make his payement | |
| | Yf he ne vsid his sely instrument | |
