| | Al this sentence me liketh eueridel | |
| | Vp stert the pardoner and that anon | |
| | Now dame quod he by god and be saint Iohn | |
| 165 | Ye be an nobyl prechour in this caas | |
| | I was aboute to wedde a wyf alas | |
| | What sholde I bye it my self so dere | |
| | Yet hadde y leuer wedde no wyf this yere | |
| | Abyde quod she my tale is not begonne | |
| 170 | Nay thou shalt drynke of another tonne | |
| | Or that I go shal sauour worse than ale | |
| | And when I haue told forth my tale | |
| | Of tribulacion that is in mariage | |
| | Of whiche I am expert in al myn age | |
| 175 | This is to sey my self haue be the whippe | |
| | Than mayst thou chese whither thou wilt sippe | |
| | Of that tonne that y shal broche | |
| | Be ware of it or thow to nygh approche | |
| | For I shal telle ensamplis mo than ten | |
| 180 | Who so wol not be waar be othir men | |
| | Be hym shal othir men correctid be | |
| | Thyse same wordis writith ptholome | |
| | Reed in his almegeste and take it there | |
| | Dame I wyl pray you if your wyl were | |
| 185 | Sayde this pardoner as ye began | |
| | Tel forth your tale spare for noman | |
| | And teche vs yong men of your practike | |
| | Gladly quod she sith it may you like | |
| | But that y pray to al this companye | |
| 190 | Yf that y speke aftir my fantesye | |
