| | To brynge me feire thingis fro the feyre | |
| | They were ful feyn whan I spak to hem faire | |
| | For god it woot I chidde hem spitously | |
| | Now herke how I baar me properly | |
| 225 | Ye wyse wyues that can vnderstonde | |
| | Thus sholde ye spekyn & bere hem an honde | |
| | For half so boldly can ther noman | |
| | Swere and lye as a woman can | |
| | I say not this but ye wyues that been wyse | |
| 230 | But yf it be when they hem mys auyse | |
| | A wyf yf that she can her good | |
| | Shal bere hym on hond the cow is wood | |
| | And take witnesse of her owen mayde | |
| | Of here assent but herkenyth how I sayde | |
| 235 | Sire olde kaynard is this thyn aray | |
| | Why is myn neyghebours wyf so gay | |
| | She is honourith where euer she goth | |
| | I sitte at home and haue no thrifty cloth | |
| | What dost thow at myn neyghebours hous | |
| 240 | Is she so fair art thou so amerous | |
| | What rownest thou with a mayde benedicite | |
| | Sire olde lechour let thy Iapis be | |
| | And yf that I haue a gossib or a frend | |
| | With outyn gilt thou chidist as a fend | |
| 245 | If that thou walkist hoom to her hous | |
| | Thou comyst hoom as dronke as a mous | |
| | Thou prechist on thy benche with euyl preef | |
| | Thou saist to me it is a gret myschief | |
| | To wedde a poure woman for costage | |
