| | But tel me this why hidist thou with sorow | |
| | The keyes of thy cheste awey fro me | |
| 310 | As wel it is my good as thyn parde | |
| | What wenyst thou to make an idiot of our dame | |
| | Now be that lord that clepid is saint Iame | |
| | Thow shalt not bothe though thou were wood | |
| | Be maister of my body and of my good | |
| 315 | That on thou shalt forgo magre thyn yen | |
| | What nedith it of me to enquere or pryen | |
| | I trow thou woldist lokke me in thy cheste | |
| | Thou sholdist say gode wyf go where ye liste | |
| | Take your disport I wol leue no talis | |
| 320 | I knowe you for a trewe wyf dame alis | |
| | We loue noman that takith kepe or charge | |
| | Where that we wol go and be at our large | |
| | Of alle maner men blessid mote he be | |
| | The wyse Astrologien dan Protholome | |
| 325 | That saith right thus in his almegeste | |
| | Of alle men his wisdom it is the beste | |
| | That reckith not who hath the world in honde | |
| | Be this prouerbe thou shalt vnderstonde | |
| | Haue ye ynough what dar ye recke or care | |
| 330 | How merily that other folkis fare | |
| | For certis olde dotardis be your leue | |
| | Ye shal haue queynte ynough at eue | |
| | Be thow neuyr wroth for myn instrument | |
| | Though it be somtyme to a good felaw lent | |
| | For he is to gret an nygard that wyl werne | |
| | A man to lighte a candel at his lanterne | |
