| | And chidyng wyuys maken men to flee | |
| 280 | Out of her howsis atonys a benedicite | |
| | What eylith suche an old man forto chyde | |
| | Thow sayst we wyuys wyl our vicis hyde | |
| | Til we be fast & than we wil hem shewe | |
| | Wel may that be a prouerbe of a shrewe | |
| 285 | Thou sayst that men assis hors and houndis | |
| | They been assayd of dyuers stoundis | |
| | Basyns lauours or that men hem bye | |
| | Sponys stolis and alle other husbondrye | |
| | And so be pottis clothis and aray | |
| 290 | But folk of wyuys make non assay | |
| | Til they be weddid to old dotard shrewis | |
| | And than sayst thou wel our vicis shewis | |
| | Thou sayst also that it displesith me | |
| | But yf thou wolt preyse my beaute | |
| 295 | And but thou poure alday in my face | |
| | And clepe me fayre dame in euery place | |
| | And but thou make a feste that ilke day | |
| | That y was born and me fresh and gay | |
| | And but thou do me norish and honoure | |
| 300 | And to my chamber with in my boure | |
| | And to my fadris folk and myn alies | |
| | Thus sayst thou olde chorle ful of lyes | |
| | And also for that our prentice Iankyn | |
| | For his crisp heris shynynge as gold fyn | |
| 305 | And for he squireth me bothe vp and doun | |
| | Yet hast thou caught a fals suspecion | |
| | I wyl hym not though thou were ded to morow | |
