| | Of wenchis wolde I bere hem ful sore on hond | |
| | When that for sike vnnethe myghte they stonde | |
| 395 | Yet tiklid I his herte for that he | |
| | Wende that I of hym hadde so gret cheerte | |
| | I swoor that al my walkyng out be nyght | |
| | Was for to spye wenchis that he dight | |
| | Vndir that colour hadde I meny a myrthe | |
| 400 | For al suche thing was gyue vs in our birthe | |
| | Disceyt wepynge spynnynge god hath yeue | |
| | To women kyndely whyle that they lyue | |
| | And thus of o thing I may auaunte me | |
| | Atte ende I hadde the bettir in eche degre | |
| 405 | By sleyghte or force or by som maner thing | |
| | Or by continuel murmur or grucchinge | |
| | Namely a bedde hadde they myschaunce | |
| | There wolde I chide and do hem no plesaunce | |
| | I wolde no lenger there abedde abyde | |
| 410 | If that I felte his arm ouer my side | |
| | Til he hadde maad his raunson vnto me | |
| | Than wolde I suffre hym do his nycete | |
| | And therfore euery man this tale I telle | |
| | Wyn who so may for al is forto selle | |
| 415 | With empty hondis men may no hawkis lure | |
| | For wynnynge wolde I as his list endure | |
| | And make me then a feyned appetit | |
| | And yet in bacon hadde y neuer delit | |
| | That made me that euer I wolde hem chyde | |
| 420 | For though the Pope hadde sitten hem beside | |
| | I wolde not spare hem at her owen borde | |
