| | For be my trouthe I quytte hem euery word | |
| | As so helpe me god omnipotent | |
| | Though right now I sholde make my testament | |
| 425 | I owe hem not o word but that it is quyt | |
| | I broughte it so aboute by my wit | |
| | That they muste yeue it vp al for the beste | |
| | Or ellis hadde we neuer be in reste | |
| | For though he lokid as wilde as a lion | |
| 430 | Yet sholde he fayle of his conclusion | |
| | Than wolde I say gode leef take kepe | |
| | How mekely lokith wilkyn our sheep | |
| | Ye sholde be al pacient and meke | |
| | Com ner my spouse lat me ba thy cheke | |
| 435 | And haue a swete spicid concience | |
| | Sith ye so speke of iobbis pacience | |
| | Suffrith alwey syn ye can so wel preche | |
| | And but ye do certeyn we wol you teche | |
| | It is feir aman to haue his wyf in pees | |
| 440 | On of vs two muste bowe doutlees | |
| | And sith a man is euer more resonable | |
| | Then a woman is ye moste be sufferabil | |
| | What eylith you to grucche and grone | |
| | It is for ye wolde haue my queynte a lone | |
| 445 | Why take it lo haue it euerydeel | |
| | Petir I shrewe you but ye loue it weel | |
| | For yf I wolde selle my bele chose | |
| | I coude walke as fressh as a Rose | |
| | But I wol kepe it for your owen toth | |
| 450 | Ye be to blame be god I say you soth | |
