| | As helpe me god whan I saw him go | |
| | Aftir the beere me thoughte he had a peyre | |
| | Of leggis and feet so clene and so feyre | |
| | That al my herte I yaf vnto his hold | |
| 590 | He was I trow twenty wynter old | |
| | But I was . xl . yf I shal sey the soth | |
| | But yet I hadde alwey a coltis toth | |
| | Gappe tothid y was but that be cam me weel | |
| | I hadde the prynt of saint venus fel | |
| 595 | As helpe god I was a ful lusty on | |
| | And feir and riche and yong & wel begoon | |
| | And trewly as my husbondis tolde me | |
| | I hadde the beste queynte that myghte be | |
| | For certis I am al fully venerian | |
| | In felinge and my herte is Marcian | |
| | Venus me yaf my lust and likerousnesse | |
| | And Marce yaf me my sturdy hardynesse | |
| | Myn ascendaunt was taure and mars ther yn | |
| 600 | Allas allas that euer loue was synne | |
| | In folowynge ay myn inclinacion | |
| | Be vertu of my constillacion | |
| | That made me that I coude not withdrawe | |
| | My chambir of venus fro a good felaw | |
| | Yet haue I a marke of Mars vp on my face | |
| | And also in another priuy place | |
| | For god so wisly be my sauacion | |
| | I louyd neuer be non discression | |
| | But euer folowid myn appetit | |
| | Al were he long short black or whit | |
