| | I took no kepe so that he liked me | |
| | How poure he was ne eke of what degre | |
| 605 | What sholde y say but at the monthis ende | |
| | This ioly clerk Iankyn that was so hende | |
| | Hath weddid me with gret solempnyte | |
| | And to hym yaf I bothe lond and fee | |
| | That euer was yeue me therbefore | |
| 610 | But aftirward me repentid it ful sore | |
| | He nolde suffre no thing of my list | |
| | By god he smoot me onys with his fist | |
| | On the cheke for y rente out of his book aleef | |
| | That of the strook myn ere wext al deef | |
| 615 | Stiborne I was as is a lyonesse | |
| | And of my tunge a very Iangelresse | |
| | And walke I wolde as I doon had beforn | |
| | Fro hous to hous al though he had ysworn | |
| | For whiche he ofte tyme wolde preche | |
| 620 | And me of olde Romaunce talis teche | |
| | How he simplicines gallus lefte his wyf | |
| | And he forsook her terme of al his lyf | |
| | Not but for ones opyn he her say | |
| | Lokyng out of his dore vp on aday | |
| 625 | Anothir wyf tolde he me be name | |
| | But for his wyf was at a someris game | |
| | Withoute his wyting he forsook her eek | |
| | And than wolde he vp on his bible seke | |
| | That ilke prouerbe of Ecclesiast | |
| 630 | Where he comaundith and biddith fast | |
| | Men shal not suffre her wyuys to royle aboute | |
