| | Til she cam there here herte was in fyre | |
| 945 | And as a bitore blondrith in the myre | |
| | She leyde her mouth vnto the watir doun | |
| | Bewrey me not thou watir with thy soun | |
| | Quod she to the I telle it and to no mo | |
| | Myn husbonde hath longe assis eris two | |
| 950 | Now is myn herte al hool now it is oute | |
| | I myght no lenger kepe it out of doute | |
| | Here mowe ye se though we a tyme abyde | |
| | Yet out it muste we can no counsel hyde | |
| | The remenant of the tale yf ye wil here | |
| 955 | Redith Ouyde and there ye may it lere | |
| | This knyght of whom my tale is specially | |
| | When that he saw he mighte not come therby | |
| | This is to say what woman louen most | |
| | With ynne his brest so sorouful was his gost | |
| 960 | But hoom he goth he mighte not soiourne | |
| | The day was come that homward moste he tourne | |
| | And in his wey as happid hym to ryde | |
| | In al his care vnder a forest syde | |
| | Where as he saw vpon a daunce go | |
| 965 | Of ladijs .xxiiij. and yet mo | |
| | Toward whiche daunce he drow ful yerne | |
| | In hope that he sholde som wisdom lerne | |
| | But certeinly or that he cam fully there | |
| | Vanysshed was this daunce he nyste where | |
| 970 | No creature saw he that baar lyff | |
| | Saue on the grene he saw sittyng a wyf | |
| | A fouler wight ther mighte noman deuyse | |
