| | Ye haue a mannys shap as wel as I | |
| | Haue ye than a figure determynat | |
| 160 | In helle there ye be in your astat | |
| | Nay certeinly quod he there haue we noon | |
| | But whan vs likith we can take vs on | |
| | Or ellis make you wene we be shape | |
| | Somtyme lik a man and somtyme lik an ape | |
| 165 | Or lik an aungel can I ryde or go | |
| | It is no wonder thing though it be so | |
| | A lowsy iogolour can disceyue the | |
| | And parde yet more craft can I than he | |
| | Why quod the sompnour ryde ye than or goon | |
| 170 | In sundry shap and not alwey in oon | |
| | For we qd he wol vs in suche fourme make | |
| | As most avayl is our prayes forto take | |
| | What makith you to haue al this labour | |
| | Wel many a cause leue sir sompnour | |
| 175 | Sayde this fend but al thing hath tyme | |
| | The day is short and it is passid pryme | |
| | And yet ne gat I no thing in this day | |
| | I wol entende to wynnynge yf I may | |
| | And not entende our wittis to declare | |
| 180 | For brothir myne thy wittis ben al to bare | |
| | To vnderstonde though I tolde hem the | |
| | But for thou axist why laboure we | |
| | For sumtyme we be goddis instrumentis | |
| | And menes to do his comaundementis | |
| 185 | When that hym list vpon his creaturis | |
| | In diuers acte and in diuers figuris | |
