| | And therfore by extorsions I lyue | |
| 130 | For soth I take al that men wol me yeue | |
| | Algate be sleyghte or be violence | |
| | From yeer to yeer I wynne al my dispence | |
| | I can no bettir telle the feithfully | |
| | Now certis quod the sompnour so fare I | |
| 135 | I spare not to take god it wot | |
| | But yf it be to heuy or to hoot | |
| | That I may gete in counsel priuely | |
| | Nomore conscience of that haue I | |
| | Nere myn extorsioun I mighte not liuyn | |
| 140 | Of suche iapis wol I not be shryuyn | |
| | Stomak ne conscience knowe I none | |
| | I shrewe the shriftefadris euerichone | |
| | Wel be we met be god and be saint Iame | |
| | But leue brothir tel me thy name | |
| 145 | Quod this sompnour in this mene whyle | |
| | This yeman gan a lityl forto smyle | |
| | Brothir quod he wolt thou that y the telle | |
| | I am a fend my duellynge is in helle | |
| | And here I ryde aboute my purchasinge | |
| 150 | To wite if men wol yeue me ony thing | |
| | My purchace is the effect of al my rent | |
| | Loke how thou ridist for al the same entent | |
| | To wynne good thou reckist neuer how | |
| | Right so fare I for ryde wold I now | |
| 155 | Vnto the worldis ende for a pray | |
| | A quod the sompnour benedicite what ye say | |
| | I wende ye hadde been a yoman trewly | |
