| | Yf it be good in Thomas lif of ynde | |
| | Ye lyen here ful of angir and of yre | |
| | With whiche the deuyl set your herte on fire | |
| 275 | And chiden here the holy Innocent | |
| | Your wyf that is here so meke and so pacient | |
| | And therfore Thomas trow me yf thou list | |
| | Ne stryue not with thy wyf as for the best | |
| | And bere thyse word a wey now be thy faith | |
| 280 | Touching such thing . lo what the wyse saith | |
| | With ynne thy hous ne be thou no lioun | |
| | To thy subiectis do thou noon oppression | |
| | Ne make thyn acqueyntaunce not to fle | |
| | And Thomas yet eft sones warne I the | |
| 285 | Be war of her that in thy bosom slepith | |
| | Ware fro the serpent that so slily crepith | |
| | Vndir the gras and styngeth ful subtilly | |
| | Bewar of her and herkyn paciently | |
| | That twenti thousand men haue lost her lyuys | |
| 290 | For striuyng with her lemmans & her wyuys | |
| | Now syn ye haue so holy a meke wyf | |
| | What nedith you Thomas to make stryf | |
| | Ther nys iwys no serpent so cruell | |
| | Whan a man tredith vpon his tayl ne half so fel | |
| 295 | As a woman is whan she hath caught yre | |
| | Verry vengeaunce is than al her desire | |
| | Ire is a synne of the grete seuyn | |
| | And ful abhominabil to the kyng of heuyn | |
| | And to hym self it is a destruction | |
| 300 | This euery lewd vicar or parson | |
