| | Quod he that may I yeue you and non othir | |
| | Ye sey me thus how that I am your brothir | |
| | Ye certis qd the frere trustith me right wel | |
| 420 | I took our dame our lettir and our seel | |
| | Now wel quod he and somwhat shal I yeue | |
| | Vnto your holy Couent whyle y lyue | |
| | And in thy hond thou shalt it haue anon | |
| | On this condicion and othir non | |
| 425 | That thou departe it so my dere brother | |
| | That euery frere haue as moche as othir | |
| | This shalt thou swere on thy professioun | |
| | Withoute fraude or cauillacioun | |
| | I swere it quod the frere vp on my feith | |
| 430 | And ther with al his hond in his he leith | |
| | Lo here my feith in me shal be no lak | |
| | Than put thy hond a doun right be my bak | |
| | Seyde this man and grope wel be hynde | |
| | Be nethe my buttok there shalt thou fynde | |
| 435 | A thyng that I haue hid in priuyte | |
| | A thoughte this frere that shal go with me | |
| | And doun his hond he launchith to the clifte | |
| | In hope forto fynde there som good yefte | |
| | And whan this sik man felte this frere | |
| 440 | Aboute his towel gropinge here and there | |
| | Amyd his hond he let the frere a fart | |
| | Ther is no Capul drawynge in a Cart | |
| | That mighte haue let a fart of suche a soun | |
| | The frere vp stert as doth a wood lioun | |
| 445 | A fals chorle quod he for Cockis bonys | |
