| | Now ete your mete and let the chorl go pley | |
| | Lete hym go hange hym self a deuyl wey | |
| 535 | Now stood the lordis squier at his bord | |
| | That carf his mete and herde word be word | |
| | Of al this thing of whiche I haue you said | |
| | My lord quod he be not euyl a payd | |
| | For I coude telle for a gowne cloth | |
| 540 | To you sire frere so that ye be not wroth | |
| | How that this fart sholde euyn delid be | |
| | Among your couent yf it like sithee | |
| | Tel quod the lord and thou shalt haue anon | |
| | A gowne cloth be god and be seynt Iohn | |
| 545 | My lord quod he when that the wedir is fair | |
| | Right here before you sittyng in a chair | |
| | Let bringe a cartewhele right in to this halle | |
| | But so that it haue his spokis alle | |
| | Xij. spokis hath a carte whele comynly | |
| 550 | And bring me .xij. freris woot ye why | |
| | For .xiij. is a couent as I gesse | |
| | Your confessour here for his wordynesse | |
| | Shal parfourme vp the noumbir of his couent | |
| | Than shul they knele doun by one assent | |
| 555 | And to euery spokis ende in this manere | |
| | Ful sadly ley his nose shal a frere | |
| | Your nobyl confessour ther god hym saue | |
| | Shal holde his nose vpright vnder the naue | |
| | Than shal this chorle with bely styf & tought | |
| 560 | As ony tabour hider be y brought | |
| | And set hym on the wheel right of this cart | |
