| | How that our daies passen in sondry wyse | |
| | For though we slepe or wake renne or ryde | |
| | Ay fleyth the tyme it wol noman abyde | |
| 120 | And though your grene yongthe flowre as yet | |
| | In crepith age as stylle as ony stoon | |
| | And deth manasseth euer age and smyte | |
| | In eche astate for ther escapith noon | |
| | And also certayn as we knowe echon | |
| 125 | That we shul dye and vncerteyn we alle | |
| | Been of the day when deth shal on vs falle | |
| | Acceptith than of vs the trewe entent | |
| | That yet neuer refuseden your heste | |
| | And we wol lord yf ye wol assent | |
| 130 | Chese you a wyf in short tyme atte leste | |
| | Born of the gentillest and of the meste | |
| | Of al this londe so that it oughte seme | |
| | Honour to god and you as I can deme | |
| | Deliuer vs out of al this besy drede | |
| 135 | And take a wyf for high goddis sake | |
| | For yf so be it befalle as god forbede | |
| | That thorow your deth your lyf sholde slake | |
| | And that a straunge successour sholde it take | |
| | Your heritage o wo were vs on lyue | |
| 140 | Wherfore we pray you hastely to wyue | |
| | Here meke prayer and here meke chere | |
| | Made the Markis herte forto haue pyte | |
| | Ye wol quod he myn owen pepyl dere | |
| | To that I neuer erst thoughte constreyne me | |
| 145 | I me reioysid in my liberte | |
