| | That selde tyme is founde in mariage | |
| | There I was fre I muste be in seruage | |
| | But natheles I se your trewe entent | |
| | And truste vp on your wit and haue doon ay | |
| 150 | Wherfore of my fre wil I wil assent | |
| | To wedde me as sone as euer y may | |
| | But ther as ye haue profrid me to day | |
| | To chese me a wyf I you relece | |
| | That chois and pray you of your profir sece | |
| 155 | For god it woot that childryn ofte been | |
| | Vnlik her worthy eldris hem before | |
| | Beaute comyth al of god not of the streen | |
| | Of whiche they be gendrid and y bore | |
| | I truste in god and euer haue do by fore | |
| 160 | My mariage and myn astate and reste | |
| | I hym betake he may do as hym leste | |
| | Lete me allone in chesing of my wyf | |
| | That charge vp on my bak y wol endure | |
| | But I you pray and charge vpon your lif | |
| 165 | What wyf that y take that ye me ensure | |
| | To worshipe her whylis her lif may dure | |
| | In word and werk bothe here & eueriwhere | |
| | As she an Emperours doughter were | |
| | And ferthermore this shal ye swere that ye | |
| 170 | Ayenst my chois shal ye neuer stryue | |
| | For sith I shal forgo my liberte | |
| | At your request as euer mot I thriue | |
| | There as my herte is set there wol y wyue | |
| | And but ye wol assente in such maner | |
