| | Vp on Grisilde this poure creature | |
| | Ful of this Markis he cast his ye | |
| | As he rood on huntynge perauenture | |
| 235 | And when it be fyl that he mighte here aspye | |
| | He not with wantoun lokyng of folye | |
| | His yen cast on hir but in sad wyse | |
| | Vp on her chere he wolde hym ofte auyse | |
| | Comendynge in his herte her woman hed | |
| 240 | And eke her vertu passing ony wight | |
| | Of so yong age as wel in chere as dede | |
| | For though the pepyl had no gret insight | |
| | He considered in vertu ful right | |
| | Her beaute and disposid hym that he wolde | |
| 245 | Wedde her only yf he euyr wedde sholde | |
| | The day of weddyng cam but no wight can | |
| | Telle what maner woman it sholde be | |
| | For whiche meruayl wondrid many a man | |
| | And sayde when they were in priuyte | |
| 250 | Wol our lorde lyue yet in vanite | |
| | Wol he not wedde allas the whyle | |
| | Why wol he hym self and vs begyle | |
| | But natheles this Markis had do make | |
| | Of gemmys set in gold and in asure | |
| 255 | Brochis and ringis for grisildis sake | |
| | And to her clothing took the mesure | |
| | Of a mayde lik vnto her stature | |
| | And eke of her other ornamentis alle | |
| | That vnto suche a weddinge sholde be falle | |
| 260 | The tyme of vndryn on the same day | |
