| | But thyse demaundis axe I first quod he | |
| | That sith it shal be doon in hasty wyse | |
| 350 | Wol ye assent or ellis you auyse | |
| | I say thus be ye redy with good herte | |
| | To al my lust and that I frely may | |
| | As me best thinkith though ye lawghe or smerte | |
| | And neuer ye to grucche nyght ne day | |
| 355 | Whan I say ye that ye say not ones nay | |
| | Nothir be word ne by frownyng contenance | |
| | Swere this and I you here assure affiaunce | |
| | Wondring vp on thyse wordis wonderly for drede | |
| | She sayde lord indigne and vnworthy | |
| 360 | I am to suche honour as ye me bede | |
| | But as ye wil your self right so wil I | |
| | And here I swere that neuer willyngly | |
| | In word or thought I wol you disobeye | |
| | Forto be ded thogh me were loth to deye | |
| 365 | This is ynough Grisilde myn quod he | |
| | And forth he goth with a ful sobir chere | |
| | Out atte dore and aftir cam she | |
| | And to the pepyl he sayde in this manere | |
| | This is my wyf quod he that stondeth here | |
| 370 | Honourith her and louith her I you pray | |
| | Who so me louith ther is no more to say | |
| | And for that no thing of her olde geer | |
| | She sholde bringe in to his hous he bad | |
| | That women sholde dispoyle here there | |
| 375 | Of whiche these ladyes were not ful glad | |
| | To handel her clothis where in she was clad | |
