| | Eche aftir other clothed in clothes blake | |
| | But suche a cry and suche a woo they make | |
| | That in this worlde nys creature lyuynge | |
| | That herde suche an other weymentynge | |
| 45 | And of this cry they wolde neuer stentyn | |
| | Tyl they the reynys of his bridyl hentyn | |
| | What folk be ye that at myn hom comyng | |
| | Perturbe me and my feste with cryynge | |
| | Quod Theseus haue ye so gret enuye | |
| 50 | Of myn honour that thus compleyne & crye | |
| | Or who hath you mysboden or offended | |
| | Tel me and it shal be amended | |
| | And why that ye be clothed thus in blak | |
| | The eldest lady of hem alle spak | |
| 55 | Whanne she hadde swowned with a dedly chere | |
| | That it was rowthe to see and to here | |
| | She sayde lord to whom fortune hath yeue | |
| | Victory and as a conquerour to lyue | |
| | Nought greueth vs your glory & your honour | |
| 60 | But we beseke you of mercy and socour | |
| | Haue mercy on our woo and distresse | |
| | Som drope of pyte for thy gentilnesse | |
| | Vp on vs wrecchid wommen let now falle | |
| | For certis lord ther is non of vs alle | |
| 65 | That she ne hath be a duchesse or a quene | |
| | Now be we caytifs as it is wel sene | |
| | I thanked be fortune and hir fals wheel | |
| | That non astat ensureth to be weel | |
| | Now certis lord to abyde your presence | |
