| 70 | Here in this temple of goddis clemence | |
| | We haue be waytinge al this fourtenyght | |
| | Now help vs lord seth it is in thy might | |
| | I | wrecched wight that wepe thus | |
| | Was somtyme wif of Campaneus | |
| 75 | That starf at Thebes acursid be that day | |
| | And alle we that ben in this aray | |
| | And make al this lamentacion | |
| | We losten alle our husbondis in that toun | |
| | Whiles the sege there aboute lay | |
| 80 | And yet now the olde creon wel a way | |
| | That lord is now of Thebes that cyte | |
| | Fulfilled of Ire and iniquyte | |
| | He for despit and his tirannye | |
| | To do the ded bodyes vilonye | |
| 85 | Of alle our lordis whiche that ben slawe | |
| | Hath alle the bodyes on an heep I drawe | |
| | And wol not suffre hem be non assent | |
| | Neyther to be buryed ne to be brent | |
| | But makith houndis to ete hem in despyt | |
| 90 | And with that word withoute more respyt | |
| | They fallen groflynge and crye pitously | |
| | Haue on vs wrecchid wommen som mercy | |
| | And let our sorow synke in thy hert | |
| | This gentil duke of his courser stert | |
| 95 | With herte pitous whenne he herde hem speke | |
| | Hym toughte his herte wolde breke | |
| | Whan he saw hem so pitous and so mate | |
| | That whilom were of so greet astate | |
