| 665 | Right gladly wolde I dye you to please | |
| | Deth may not make no maner of comparison | |
| | Vnto your loue / and when this Markis say | |
| | The constaunce of his wyf he cast a doun | |
| | His yen two and wondrid that she may | |
| 670 | In pacience suffir al this maner aray | |
| | And forth he goth with drery contenaunce | |
| | But to his herte it was ful gret plesaunce | |
| | This vgle seriaunt in the same wyse | |
| | That her doughter caughte right so he | |
| 675 | Or wors yf men can wors deuyse | |
| | Hath hent her sone that ful is of beaute | |
| | And euer in one so pacient was she | |
| | That she no chere of heuynes | |
| | But kist hym sone and aftir gan hym bles | |
| 680 | Saue this she prayde hym yf that he mighte | |
| | Her litil sone he wolde in the erthe graue | |
| | His tendir lymes delicat in sighte | |
| | Fro foulis and fro bestis it to saue | |
| | But she non other answer of hym mighte haue | |
| 685 | He wente his wey as he no thing thoughte | |
| | But to boleyne he it tenderly broughte | |
| | This Markis wondred euer lenger the more | |
| | Vp on her pacience and that she | |
| | Had not knowe sothly therfore | |
| 690 | That parfitly her children loued she | |
| | He wolde haue wend of som subtilte | |
| | And of malice and for cruel corage | |
| | That she hadde suffrid this with sad visage | |
