| | Toward her fadris hous is she fare | |
| | The folk her folowyn wepyng in her wey | |
| | And fortune euer they cursid as they goon | |
| | But she fro wepyng kepte her yen dreye | |
| 900 | Ne in this tyme word spak she noon | |
| | Her fadir that thyse tidinges herde anon | |
| | Cursid the day and the tyme that nature | |
| | Shoop hym to be a lyuys creature | |
| | For oute of doute this olde poure man | |
| 905 | Was euer suspect of her mariage | |
| | For euer he demyd sith it be gan | |
| | That whan the lord had fulfild his corage | |
| | He wolde thinke it were a disparage | |
| | To his astat so lowe to light | |
| 910 | And voyden her as sone as euer he might | |
| | Ayens his doughter hastely goth he | |
| | For he by noyse of folk knew her comynge | |
| | And with her olde cote as it mighte be | |
| | He keuerid her ful soroufully wepyng | |
| 915 | But on her body mighte he it not brynge | |
| | For rude was the cloth and she more of age | |
| | Be daies fele than was her mariage | |
| | Than with her fader for a certeyn spaas | |
| | Duellid this flour of wifly pacience | |
| 920 | That neuer by her word ne by her face | |
| | Beforn the folk ne in her absence | |
| | Ne shewde she that her was doon offence | |
| | Ne of hir high astat no remembraunce | |
| | Ne had she as by ony maner contenaunce | |
