| | And here ayeen my clothing I restore | |
| | And eke my weddyng ryng for euermore | |
| | The remenaunt of your iewellis redy they be | |
| 870 | With ynne your chamber I dar it safly seyn | |
| | Nakid out of my fadres hous quod she | |
| | I cam and nakid muste I turne ayeen | |
| | Al your plesaunce folow wolde I feyn | |
| | But yet I hope it be not your entent | |
| 875 | That I smokles out of your paleis went | |
| | Ye coude not do so dishonest a thyng | |
| | That ilke wombe in whiche your children lay | |
| | Sholde before the pepyl in my walkyng | |
| | Be seye al bare wherfore I you pray | |
| 880 | Let me not lik a worm go by the wey | |
| | Remembre you myn owen lord so dere | |
| | I was your wyf thogh I vnworthy were | |
| | Wherfore in guerdom of my maydenhede | |
| | Whiche that I broughte and not ayen y bere | |
| 885 | As vouchesauf as yeue me to my mede | |
| | But suche a smok as I was wont to were | |
| | That I therwith may wrye the wombe of here | |
| | That was your wyf and here I take my leue | |
| | Of you myn owen lord leest that I you greue | |
| 890 | The smok quod he that thou hast vp on thy bak | |
| | Let it be stylle and bere it forth with the | |
| | But wel vnnethe that word he spak | |
| | But wente his wey for routhe and pyte | |
| | Be for the folk her self striped hath she | |
| 895 | And in her smok with foot and heer al bare | |
