| | I am your trewe wyf it is no drede | |
| | God shilde suche a lordis wyf to take | |
| 840 | Another husbond or ony man to make | |
| | And of your newe wyf god of his grace | |
| | So he graunte you weel and prosperite | |
| | For I wol gladly yelde her my place | |
| | In whiche I was blesful wont to be | |
| 845 | For sith it liketh you my lord quod she | |
| | That som tyme were al my hertis reste | |
| | That y shal goon I wol go whan ye leste | |
| | But there as ye me profre such dowere | |
| | As I first broughte it is wel in my mynde | |
| 850 | It were my wrecchid clothis no thing feir | |
| | The whiche to me now were hard to fynde | |
| | O goode god / how gentil and how kynde | |
| | Ye semyd by your speche and your visage | |
| | The day that maad was our mariage | |
| 855 | But soth is said alwey I fynde it trewe | |
| | For in effect ypreuyd it is on me | |
| | Loue is not olde as when it is newe | |
| | But certis lord for non aduersite | |
| | To dye in this caas it shal not be | |
| 860 | That euer in word or werk I shal repent | |
| | That I you yeue my herte in hool entent | |
| | My lord ye woot that in my fadres place | |
| | Ye did me stripe out of my poure wede | |
| | And richely ye me clad of your grace | |
| 865 | To you broughte y nought ellis out of drede | |
| | But feith nakidnes and my maydenhede | |
