| | Retourneth to your fadris hous quod he | |
| 810 | No man may alwey haue prosperyte | |
| | With euyn herte I rede you to endure | |
| | The strook of fortune or of auenture | |
| | And she agayn answerde in pacience | |
| | My lusty lord quod she I woot & wiste alwey | |
| 815 | How that betwixt your magnificence | |
| | And my pouerte no wight can ne may | |
| | Make ony comparison it is no nay | |
| | I ne helde me neuer digne in no manere | |
| | To be your wyf neyther your chamberere | |
| 820 | And in this hous there ye me lady made | |
| | The high god take I for witnes | |
| | And also wisly he my soule glade | |
| | I neuyr helde me lady ne maistres | |
| | But humble seruaunt to your worthynes | |
| 825 | And euer shal whyle my lif may endure | |
| | Abouen euery wordly creature | |
| | That ye haue so longe of your benignite | |
| | Holde me in high nobles and honourey | |
| | There as I was not worthy forto be | |
| 830 | That thanke I god to whom I prey | |
| | Foryelde it you ther is no more to sey | |
| | Vnto my fader gladly wol I wende | |
| | And with hym duelle to my liuys ende | |
| | There as I was fostrid of a child ful smal | |
| 835 | Tyl I be ded my lif there wol I lede | |
| | A widow cleen in body herte and al | |
| | For seth I yaf to you my maydenhede | |
