| | Aftir the tyme muste be temperance | |
| | To euery wight that can of gouernaunce | |
| | And therfore hath this wyse worthy knyght | |
| 80 | To lyuyn in her suffraunce hir behight | |
| | And she to hym ful wisly gan swere | |
| | That neuer sholde be defaute in here | |
| | Here men may se in humble wyse acorde | |
| | Thus hath she take her seruaunt and her lord | |
| 85 | Seruaunt in loue and in mariage | |
| | Than was he bothe in lordship and in seruage | |
| | Seruage nay but in lordship aboue | |
| | Sithe he hath bothe his lady and his loue | |
| | His lady certis and his wyf also | |
| 90 | The whiche lawe and loue accordith therto | |
| | And when he was in his prosperite | |
| | Home with his wyf he goth to his contre | |
| | Not fer fro Padmak his dwellyng was | |
| | Where as he lyuyth in blis and in solas | |
| 95 | Who coude telle but he that weddid had be | |
| | The ioye the ese and the prosperite | |
| | That is betwix an husbond and his wyf | |
| | A yeer or more lestith this blisful lyf | |
| | Til that this knyght of whiche I spak thus | |
| 100 | That of kynrede was clepid Arueragus | |
| | Shoop hym to goon & duelle a yeer or twayne | |
| | In Engelond that clepid was Britayne | |
| | To seke in armys worship and honour | |
| | For al his lust he sette in such labour | |
| 105 | And duellid there two yeer the book saith thus | |
