| | Ne wolde god neuer betwix vs tweyne | |
| | As in my gilt were othir werre or strif | |
| 50 | Sire I wil be your humble trewe wyf | |
| | Haue here my trouthe til my herte brest | |
| | Thus ben they bothe in quyete and in rest | |
| | For o thyng sires sauely dar I say | |
| | That frendis eueriche other muste obeye | |
| | In loue and forbere eche other nedely | |
| | Yf they wil lyue in pees and hold companye | |
| | When maistrie is come the god of loue anon | |
| | Betith her wyngis and fare wel it is goon | |
| | Loue is a thing as ony thought fre | |
| 60 | For women of kynde desiren liberte | |
| | And nat to be constreyned as a thrall | |
| | And so doth men yf I the sothe telle shal | |
| | Loke who is most pacient in loue | |
| | He is at his auauntage al a boue | |
| 65 | Pacience is an high vertu certeyn | |
| | For it venquyssheth as clerkis sayn | |
| | Thingis that rigour shal neuer atteyne | |
| | For euery word men may not chide or pleyne | |
| | Lernyth to suffre or ellis so mot I goon | |
| 70 | Ye shal it lerne whethir ye wil or noon | |
| | For in this worlde certeyn no wight is | |
| | That he ne doth or saith somtyme amys | |
| | Ire siknes or constillacioun | |
| | Wyne woo or chaungynge of complexioun | |
| 75 | Causith ful ofte to do amys or spekyn | |
| | On euery wrong aman may not be wrekyn | |
