| | Why haue ye wrought this work vnresonabil | |
| 165 | For by this werke North south west ne est | |
| | Ther nys y fostrid man brid ne best | |
| | It doth no good to my wit but annoieth | |
| | Se ye not lorde how mankynde it destroieth | |
| | An hundrid thousand bodyes of mankynde | |
| 170 | Haue rockis slayn al though they be not in mynde | |
| | Syn mankynde is so fair a part of thy werk | |
| | Thou it maad first lik to thyn owen merk | |
| | Than semyth it ye haue do a gret charite | |
| | Toward mankynde how mighte it than be | |
| 175 | That ye suche menys make it to destroien | |
| | Suche menes do no good but annoien | |
| | I woot wel clerkis wol say as hem list | |
| | Be argumentis that al is for the best | |
| | Though I ne can the causis wel knowe | |
| 180 | But that god that made the wynd to blowe | |
| | As kepe my lord this is my conclusion | |
| | To clerkis lete I al disputacion | |
| | But wolde god that alle thyse Rockis blake | |
| | Were sonkyn in to helle for his sake | |
| 185 | Thyse rockis sle my herte for feer | |
| | Thus wolde she say with many a pitous teer | |
| | Here frendis sawe that it was no disport | |
| | To romyn be the see but discomforte | |
| | And shapen for to pley somwhere ellis | |
| 190 | They ledyn here by Reueris and by wellis | |
| | And in other places dilectablis | |
| | They daunsyn and pleyn atte ches & atte tablis | |
