| | So on a day right on the morow tide | |
| | Vnto a gardyn that was there beside | |
| 195 | In whiche that they had made her ordynaunce | |
| | Of vitayl and of othir purueaunce | |
| | They goon and pleyn hem al the longe day | |
| | And this was in the sixte morow of May | |
| | Whiche may hath peintid with her soft showris | |
| 200 | This gardyn ful of leuys and of flouris | |
| | And craft of mannys hond so coriously | |
| | Araid hath this gardyn trewly | |
| | That neuer was ther gardyn of suche pris | |
| | But yf it were the verry paradise | |
| 205 | The odour of flouris and the fressh sighte | |
| | Wolde haue maad ony herte lighte | |
| | That euer was born but yf gret siknes | |
| | Or to greet sorow held it in distres | |
| | So ful it was of beaute with plesaunce | |
| 210 | Anon aftir dyner gonne they daunce | |
| | And song also saue dorigene alone | |
| | Whiche made alwey her compleynt & hir mone | |
| | For she ne saw hym in the daunce go | |
| | That was her husbond and her loue also | |
| 215 | But natheles she must her tyme abyde | |
| | And with good hope lete her sorowis slyde | |
| | Vp on this daunce among other men | |
| | Daunsid a squier befor dorigene | |
| | That fressher was and Iolier of assay | |
| 220 | As to my dome than is the monthe of May | |
| | He singith daunsith passing ony other man | |
