| | But no thing wiste she of his entent | |
| | Natheles it happid or they thens went | |
| | Be cause that he was her neyghebour | |
| | And was a man of worship and honour | |
| 255 | And hadde knowen hym of tymes yore | |
| | They fallen in speche and so more and more | |
| | In to his purpos drew Aurilius | |
| | And whan he saw his tyme he said thus | |
| | Madame quod he by god that this worlde made | |
| 260 | So that I wiste I mighte your herte glade | |
| | I wolde that day that your Arueragus | |
| | Went ouer the se that I Aurelius | |
| | Had gone there I sholde neuer come ayeen | |
| | For wel I woot my seruise is in veyn | |
| 265 | My guerdom is but brestyng of myn herte | |
| | Madame rewe on my peynys smerte | |
| | Here at your feet god wolde I were begraue | |
| | For as wisly as god my sowle saue | |
| | I ne haue as now no more leyser to seye | |
| 270 | Haue mercy swete or ye wol do me deye | |
| | She gan to loke vp on this Aurelius | |
| | Is this your wil quod she and say ye thus | |
| | Neuer yet quod she wist I what ye ment | |
| | Ne neuer vnderstode I your entent | |
| 275 | By that god that yaf me soule and lif | |
| | Ne shal I neuer be vntrew wif | |
| | In word ne in werk as fer as I haue wyt | |
| | I wil be his to whom I am knyt | |
| | Take this for fynal answer as of me | |
