| 280 | But aftir than in pley thus said she | |
| | Aurely said she be high god aboue | |
| | Yet wol I graunte to be your loue | |
| | Syn I se you so pitously compleyne | |
| | Loke what day fro Englond to britaigne | |
| 285 | Ye remeue al the rockis stoon be stoon | |
| | That they ne lette ship ne boot to goon | |
| | I say whan ye haue made this coste so clene | |
| | Of rockis that ther is no stoon I seen | |
| | Than wol I loue you best of ony man | |
| 290 | Haue here my trouthe in al that euer I can | |
| | For I woot that it shal neuer betyde | |
| | Let suche folye out of your herte a slyde | |
| 295 | What deynte sholde a man haue in his lyf | |
| | Forto go loue anothir mannys wyf | |
| | And her had when so that hym likith | |
| | Aurilius ful sore ofte he sikith | |
| | Is ther none other grace in you quod he | |
| | No by that lord that made me | |
| | Wo was Aurily whan he this herde | |
| 300 | And with a sorowful herte he thus answerde | |
| | Madame quod he this were impossibil | |
| | Than muste I dye in sodeyn deth horribil | |
| | And with that word he turned hym anon | |
| | Tho com her other frendes many on | |
| 305 | And in the aleyes romedyn vp an doun | |
| | And no thing wistyn of this conclusion | |
| | And sodenly begonnen reuel newe | |
| | Til the bright sonne lost his hewe | |
