| | That of the see clif goddesse is and quene | |
| | Though Neptunus haue deyte in the see | |
| 340 | Yet Emperesse aboue hym is she | |
| | Ye know wel lord right as her desire | |
| | Is to be quyckened and lightnyd of your fyre | |
| | For which she folowith you ful besily | |
| | Right so the see desirith naturelly | |
| 345 | To folow her and she that is goddes | |
| | Bothe in the see and ryuers more and les | |
| | Wherfore lord Phebus this is my request | |
| | Do this mirakil or do myn herte brest | |
| | That thou next at this opposicion | |
| 350 | With ynne whiche signe shal be the lioun | |
| | As praieth her so greet a flood to brynge | |
| | That fyue fadom at the leest it ouer springe | |
| | The hiest rok that is in al Bretayne | |
| | And leet this flood endure yeris tweyne | |
| 355 | Than certis to my lady may I sey | |
| | Holdith your hest the rokkis be awey | |
| | Lord Phebus this mirakil do for me | |
| | Pray here that she go no faster cours than ye | |
| | I say thus pray your sustir that she go | |
| 360 | No fastir cours than ye in yeris two | |
| | Than shal she be at euene ful alway | |
| | And springe flood laste bothe nyght and day | |
| | And but ye vouchesauf in suche manere | |
| | To graunte me my souereyn lady dere | |
| 365 | Pray her to synke euery rok a doun | |
| | Into helle her owen derk mansioun | |
