| | With Creon whiche was of thebes kyng | |
| | He faught and slow hym manly as a knyght | |
| 130 | In playn bataille and put his folk to fight | |
| | And at a sawte he wan the cyte aftir | |
| | And rente a doun wal sparre and raftir | |
| | And to the ladyes he restored ageyn | |
| | The bodyes of her husbondis that were sleyn | |
| 135 | To do obsequyes as tho was the gyse | |
| | But it were al to long to douyse | |
| | The gret clamour and the weymentyng | |
| | That the ladyes made at the buryyng | |
| | Of the bodyes and the grete honour | |
| 140 | That Theseus the nobil conquerour | |
| | Doth to the ladyes when they fro hym went | |
| | But shortly forto telle is myn entent | |
| | When that this worthy duke this Theseus | |
| | Hath Creon slayn and wan Thebes thus | |
| 145 | Stille in the felde he took al nyght his rest | |
| | And dide with al the contre right as hym list | |
| | He ransaked in the taas of bodyes dede | |
| | Hem for to strype of harneis and of wede | |
| | The pilours dide hir besinesse and cure | |
| 150 | Aftir the bataille and the discomfiture | |
| | And befil that in that taas they fond | |
| | Thorow girt with meny a greuous wound | |
| | Two yonge knyghtis lyyng by and by | |
| | Bothe in one harneis wrought ful richely | |
| 155 | Of whiche two arcite highte that one | |
| | And the other highte Palamon | |
