| | And brynge hem forth in despit | |
| | Al nakid to fulfille her delit | |
| 665 | And on her fadres blood made hem daunce | |
| | Vp on the pament god yeue hem myschaunce | |
| | For whiche the woful maydens ful of drede | |
| | Rathir than they wolde lese her maydenhede | |
| | They been priuely stert in to a welle | |
| 670 | And dreynt hem self as the bokis telle | |
| | They of meten leten enquire and seke | |
| | Of lacedomy fifty maydens eke | |
| | On whiche they wolden a done her lecherye | |
| | But was ther non of al that company | |
| 675 | That she nas sleyn & that with glad entent | |
| | Chees rather to dye than to assent | |
| | To be oppressid of her maydenhede | |
| | Why sholde I thanne to dye be in drede | |
| | Lo eke the tiraunt Aristoclides | |
| 680 | That louyd a mayde highte Stymphalides | |
| | When her fader sleyn was on a nyght | |
| | Vnto dianes goth she right | |
| | And hente the ymage in her hondis two | |
| | From whiche ymage wolde she not go | |
| 685 | No wight the hondis of here myghte arace | |
| | Til she was sleyn right in the place | |
| | Now sith that maydens hadde suche despit | |
| | To been dispoylid with mannys delit | |
| | Wel oughte a wyf rathir her self to sle | |
| 690 | Than be defoylid as thinkith me | |
| | What shal I say of Hasdribaldis wyf | |
