| | Allas quod she that euer this sholde happe | |
| 635 | For wende I neuer be possibilite | |
| | That suche a meruayl mighte be | |
| | That is ayens the proces of nature | |
| | And hoom she goth a sorouful creature | |
| | For ferry feer vnnethe might she go | |
| 640 | She wepith and waylith a day or two | |
| | And swownyth that rowthe was to se | |
| | But why it was vnto noman tolde she | |
| | For out of towne was goon Arueragus | |
| | But to her self she spak and sayde thus | |
| 645 | With face paal and sorouful chere | |
| | In her compleynt as ye shul aftir here | |
| | Allas quod she on the fortune I pleyne | |
| | That vnwaar wrappid hast me in thy cheyne | |
| | Fro whiche to scape knowe I no socour | |
| 650 | Saue only deth or to grete dishonour | |
| | One of thyse two behouyth me to chese | |
| | But natheles yet haue I leuyr lese | |
| | My lyf than of my body haue a shame | |
| | Or knowe my self fals or lese my name | |
| 655 | And with my deth I may be quyt Iwis | |
| | Hath ther nat many an nobil wyf or this | |
| | And many a mayde sleyn her self allas | |
| | Rathir than with her body done trespaas | |
| | Yes certes thyse storyes berith witnes | |
| 660 | When . xxx . tirauntis ful of cursidnes | |
| | Hadde sleyn cruelly Fidon acte feste | |
| | They comaundid his doughtris forto areste | |
