| 605 | And lothest were in al this worlde displese | |
| | Nere it for you I haue suche disese | |
| | That I moot dye here at your foot anon | |
| | Nought wolde I telle you me is wo begoon | |
| | But certis or I muste dye or pleyne | |
| 610 | Ye sle me giltles for verry peyne | |
| | But of my deth ye haue no routhe | |
| | Thinkith now vp on your trouthe | |
| | And repente you for that god aboue | |
| | Or ye me sle by cause that I you loue | |
| 615 | For Madame wel ye woot what ye haue hight | |
| | Not that I chalange ony thing of right | |
| | Of you my souereyn lady but of your grace | |
| | But in the gardyn yonder in suche a place | |
| | Ye witen right weel what ye behetyn me | |
| 620 | And in myn hond there your trouthe plight ye | |
| | To loue me best / god woot ye sayde so | |
| | Al be it that vnworthy I be therto | |
| | Madame I speke for the honour of you | |
| | More than forto saue my hertis lif right now | |
| 625 | I haue ydo as ye comaunded me | |
| | And yf ye vouchesauf ye mowe se | |
| | Sith as you list haue your hest in mynde | |
| | For quyck or ded trewe shul ye me fynde | |
| | In you lith to do me lyue or deye | |
| 630 | But wel I woot the rockis been a weye | |
| | He takith his leue and she a stoned stood | |
| | In al her face nas o drope of blood | |
| | She wende neuer to come in suche a trappe | |
