| | Ful subtilly he calked al this | |
| | Whan he hadde his firste mansion | |
| | He knew the remenaunt by proporcion | |
| | And knew the risinge of the mone well | |
| 580 | And in whos face and signe eueridell | |
| | And knew wel the monys mansion | |
| | Attendant vnto his operacion | |
| | And he knew also wel his other obseruauncis | |
| | For suche illusions and suche myschauncis | |
| 585 | As hethen folk vseden in tho dayes | |
| | For sothe no lenger makith he delayes | |
| | But thorow his magik a woke or tweye | |
| | It semyd that al the rockis were a weye | |
| | Aurilius yet whiche that despeyrid is | |
| 590 | Wher he shal haue her loue or fare amys | |
| | And waytith nyght and day on this mirakil | |
| | And when he knew ther was non obstakil | |
| | That voidid were the rockis echon | |
| | Doun to his maistris feet he fyl anon | |
| 595 | And sayde I woful wrecched Aurilius | |
| | Thanke you lord and my lady venus | |
| | That me haue holpe fro my caris colde | |
| | And to the tempil his wey hath he holde | |
| | Where as he knew he sholde his lady se | |
| 600 | And when he saw his tyme anon right he | |
| | With dredful herte and humbil chere | |
| | Salewid hath his souereyn lady dere | |
| | My right lady quod this woful man | |
| | Whom y most drede and loue as I best can | |
