| 750 | Home comyth Arueragus the worthy knyght | |
| | And axeth here why she wepith so sore | |
| | And she gan wepe euer lengir the more | |
| 755 | And told hym al the caas by and by | |
| | How she had promysed ignorantly | |
| | The squier like as ye haue herd to fore | |
| | Hit nedeth not to reherce hit ony more | |
| | This husbond with glad chere in frendly wyse | |
| | Answerde and sayde as I shal deuyse | |
| | Is ther aught ellis Dorigene but this | |
| 760 | Nay nay she sayde god helpe me so as wis | |
| | This is to mykil and it ne were goddis wyl | |
| | Ye wyf quod he lat slepyn and be styll | |
| | It may be wel yet perauenture to day | |
| | Ye shal your trouthe holde be my fay | |
| 765 | For god so wisly haue mercy on me | |
| | I hadde wel leuer stikid forto be | |
| | For verry loue whiche I to you haue | |
| | But ye sholde your trouthe kepe and saue | |
| | Trouthe is the hiest thing that man may kepe | |
| 770 | But with that worde she brast anon to wepe | |
| | And sayde I you forbede on peyne of deth | |
| | That neuer whyle you lastith lyf or breth | |
| | To no wight to telle of this mysauenture | |
| | As I may best I wol my woo endure | |
| 775 | Ne make no contenaunce of heuynes | |
| | That folk of you may deme harm or ges | |
| | And forth he clepith a squier and a mayde | |
| | Go forth anone with Dorigene he sayde | |
