| | And bryng her to suche a place anone | |
| 780 | They toke her leue and on her wey they goon | |
| | But they ne wiste why she thyder wente | |
| | He wolde no wight telle his entente | |
| | This squier whiche hight Aurilius | |
| | On Dorigene that was amerous | |
| 785 | Of auenture happid here to mete | |
| | Amyd the town right in the quickest strete | |
| | As she wold haue gon the wey forth right | |
| | Toward the gardyn there as she hadde hight | |
| | And he was in to the gardyn ward also | |
| 790 | For wel he spyed when she wolde go | |
| | Out of her hous to ony maner place | |
| | But thus they metyn be auenture and grace | |
| | And he salueth her with glad entent | |
| | And axid of her whithirward she went | |
| 795 | And she answerde half as she were mad | |
| | Vnto the gardyn as my husbond bad | |
| | My trouthe forto holde allas allas | |
| | Aurilius gan wonder in this caas | |
| | And in his herte hadde gret compassion | |
| 800 | Of her chere and of her lamentacion | |
| | And of Arueragus the worthy knyght | |
| | That bad her holde that she had hight | |
| | So loth him was yf she sholde breke her trouthe | |
| | And in his herte he caughte of this gret rowthe | |
| 805 | Considerynge the beste on euery side | |
| | That from that lust yet were hym leuer abyde | |
| | Than to do so high a folissh wrecchidnes | |
