| | Ageyns fraunchecie and gentilnes | |
| | For whiche in fewe wordis sayde he thus | |
| 810 | Madame say to your lord Arueragus | |
| | That sith y se his grete gentilnes | |
| | To you and eke I se your distres | |
| | That him were leuer haue a shame & þt were routhe | |
| | Than ye to me this sholde breke your trouthe | |
| 815 | I haue wel leuyr euyr to suffre woo | |
| | Than I departe sholde the loue beetwix you two | |
| | I you relece Madame in to your hond | |
| | Quyt euery surement and euery bond | |
| | That ye haue made to me as here beforn | |
| 820 | Sithen that tyme that ye were first born | |
| | My trouthe y plight I shal you neuer repreue | |
| | Of noon beheste and here I take my leue | |
| | As of the trewest and eke the best wyf | |
| | That euer yet I knew in al my lyf | |
| 825 | But euery wyf bewaar of her beheste | |
| | On Dorigene remembrith atte leste | |
| | Thus can a squier do a gentil dede | |
| | As wel as can a knyght withouten drede | |
| | She thankith hym vp on her knees bare | |
| 830 | And hoom to hir husbonde is she fare | |
| | And tolde hym al as ye haue herd me said | |
| | And be ye sikir that he was wel a paid | |
| | That it were impossible me to wryte | |
| | What sholde I lenger of this caas endite | |
| 835 | Arueragus and Dorigene his wyf | |
| | In souereyn blisse ledyn forth her lyf | |
